13.06.2016 |
БАСПАСӨЗ РЕЛИЗІ
12 маусымда Алматы облысынан шығып қалған Парламент Сенаты депутатының орнына кандидаттарды тіркеу аяқталды
Алматы облысынан шығып қалған Қазақстан Республикасы Парламенті Сенаты депутатының орнына сайлауды әзірлеу мен өткізу жөніндегі негізгі іс-шаралардың күнтізбелік жоспарына сәйкес 12 маусымда кандидаттарды тіркеу аяқталды.
Облыстық сайлау комиссиясы Қазақстан Республикасы Парламенті Сенаты депутатының мандатына ұсынылған жеті үміткердің үш кандидатын ғана – өз кандидатураларын өзін-өзі ұсыну тәртібімен ұсынған Е.Т. Мұжықов пен А.А. Жолдағұтовты, сондай-ақ Ескелді, Қаратал және Еңбекшіқазақ аудандық мәслихаттары ұсынған Н.Н. Қылышбаевты тіркеді.
Бір үміткер Қазақстан Республикасы Парламенті Сенатының депутаттығына кандидаттарға Қазақстан Республикасы Конституциясы және сайлау заңнамасы қойған талаптарына сәйкес келмегендіктен, сайлау додасынан шығып қалды. Тағы үш үміткерді барлық қажетті құжаттарды заңнамада белгіленген мерзімде ұсынбағандықтан тіркеуден бас тартылды.
13 маусымнан бастап Сенат депутаттығына тіркелген барлық кандидаттардың сайлауалды үгітке кірісу мүмкіндігі бар, үгіт Күнтізбелік жоспарға сәйкес 2016 жылғы 29 маусым күнгі сағ. 24.00-ге дейін жүргізіледі.
Бұл ретте барлық кандидаттарға үгіттік жұмысты жүргізу үшін тең жағдайларға кепілдік берілген.
Оның ішінде БАҚ арқылы үгіт жүргізу үшін әр кандидатқа республикалық бюджеттен телевизиядан 15 минуттық сөз сөйлеуiне, радиодан 10 минуттық сөз сөйлеуіне, сондай-ақ баспа басылымдарында 0,1 баспа табақтан аспайтын көлемде екi мақала жариялауына тең мөлшерде қаражат бөлінді.
Кандидаттар шығыстарының мөлшерлерін бекіту туралы тиісті қаулыны Ортсайлауком 8 маусымда қабылдады. Аталған қаулыға сәйкес әрбір тіркелген кандидатқа республикалық бюджет қаражатынан телевизиядан сөз сөйлеуіне 140 000 теңге; радиодан сөз сөйлеуіне 65 000 теңге; баспа басылымдарында екі мақала жариялауға 120 000 теңге; таңдаушылармен кездесулер үшін үй-жайды жалға алуға – 25 000 теңге; көліктік шығыстарға 110 000 теңге бөлінеді.
Сонымен қатар кандидаттардың сайлауалды үгітті заңда белгіленген тәртіпте өздері құрған сайлау қорларының қаражатынан да қаржыландыру мүмкіндіктері бар.
Жұрт алдында сөз сөйлеуі үшін сайлау комиссиясының өтініші бойынша жергілікті мемлекеттік басқару органдары кандидаттарға келісім шарт негізінде және басқа кандидаттармен тең жағдайда таңдаушылармен және азаматтармен кездесулер үшін үй-жай беруге міндетті.
Сондай-ақ кандидат сайлауалды үгітті баспа, дыбыс-бейне және басқа да үгіттік материалдарды басып шығару және тарату арқылы жүргізе алады. Бұл ретте барлық үгіттік баспа материалдары шығарған ұйым, олар басылған жерi мен таралымы, тапсырыс жасаған тұлғалар, қандай қаражаттан төленгендiгi туралы мәлiметтерді қамтуы тиіс.
Жергiлiктi атқарушы органдар сайлау комиссиясымен бiрлесiп барлық кандидаттар үшiн үгіттiк баспа материалдарын орналастыру үшiн орын белгiлейдi және оларды стендтермен, тақталармен, тұғырлықтармен жарақтандырады.
24 маусымнан кешіктірмей Қазақстан Республикасы Парламенті Сенатының депутатын сайлау бойынша таңдаушылар тізімдері танысу үшін жергілікті бұқаралық ақпарат құралдарында жариялануы тиіс.
Дауыс беруді, дауыстарды санауды және дауыс беру нәтижелерін жариялауды Алматы облыстық сайлау комиссиясы бір күн ішінде – 1 шілдеде жүргізеді.
2016 жылғы 7 шілдеден кешіктірмей Орталық сайлау комиссиясы сайлаудың соңғы қорытындыларын белгілеп, 10 шілдеден кешіктірмей БАҚ-та жариялауы тиіс.
Жалпы сайлау науқаны тыныш жағдайда және сайлау заңнамасына сәйкес өтуде.
Қазақстан Республикасы Орталық сайлау комиссиясының
Баспасөз қызметі
тел. 75-28-44, 75-23-69