06.06.2016 |
БАСПАСӨЗ РЕЛИЗІ
5 маусымда Алматы облысынан шығып қалған Қазақстан Республикасы Парламенті Сенаты депутатының орнына кандидаттарды ұсыну аяқталды
Алматы облысынан шығып қалған Қазақстан Республикасы Парламенті Сенаты депутатының орнына сайлауды әзірлеу мен өткізу жөніндегі негізгі іс-шаралардың күнтізбеік жоспарына сәйкес 5 маусымда кандидаттарды ұсыну аяқталды.
2016 жылғы 17 мамыр – 5 маусым аралығындағы кезеңде Қазақстан Республикасы Парламенті Сенатының депутаттығына барлығы 7 кандидат ұсынылды. Олардың ішінде 1 кандидатты мәслихаттар ұсынған, тағы 6 азамат өзін-өзі ұсыну құқығын пайдаланды.
Бір үміткер Қазақстан Республикасы Парламенті Сенатының депутаттығына кандидаттарға Қазақстан Республикасы Конституциясы және сайлау заңнамасы қойған талаптарына сәйкес келмегендіктен, сайлау додасынан шығып қалды.
Кандидаттардың орташа жасы 46 жасты құрайды.
Мамандықтары бойынша: 1 – инженер; 1- ауыл шаруашылығы қызметкері; 4 – экономист; 1 - заңгер.
Кәсіп түрі бойынша: 3 - мемлекеттік органдардың, ұйымдардың, кәсіпорындар мен мекемелердің қызметкерлері, 3 - коммерциялық құрылымдардың қызметкерлері, 1 – ҮЕҰ-ның қызметкері.
Қазіргі уақытта ұсынылған кандидаттар өзін қолдау үшін жинаған таңдаушылар қолдарының растығын тексеру жөніндегі жұмыс жалғасуда. Сайлау комиссияларының мүшелерінен басқа аталған жұмысқа төлқұжат қызметінің қызметкерлері тартылған.
Сайлау туралы заң сайлау комиссияларын кандидат толтырылған қол қою парақтарын тапсырғаннан кейін бес күн мерзім ішінде тексеруді аяқтауға міндеттейді. Бұл ретте әр қол қою парағы тиісті түрде ресімделуі тиіс. Реттік нөмiрi болуы және оған кандидаттың және қол жинаушының тегi, аты, әкесiнiң аты, кандидаттың өз қолы, сондай-ақ өз қолдарын қойған таңдаушылар туралы мәліметтер қамтылған бағандар енгізілуі тиіс.
Сонымен қатар Сенат депутаттығына кандидат ретінде тіркелу үшін үміткерлер Алматы облысының аумақтық сайлау комиссиясына өзінің және жұбайының (зайыбының) табысы және мүлкі туралы декларация тапсырғандары туралы салық органының анықтамасын және сайлау жарнасын енгізгенін куәландыратын құжатты ұсынуы тиіс.
Кандидат пен оның жұбайының жариялаған табысы және мүлкі туралы мәліметтердің дұрыстығын салық қызметi органдары кандидат тіркелген күннен бастап он бес күн ішінде тексереді.
Бұл мәліметтердің дұрыс еместігі Сенат депутаттығына кандидат ретінде тіркеуден бас тартуға немесе тіркеуі туралы шешімнің күшін жоюға негіз бола алады.
5 маусымдағы жағдай боыйнша Алматы облысының аумақтық сайлау комиссиясы Сенат депутаттығына 3 кандидатты тіркеді.
Алматы облысынан шығып қалған Қазақстан Республикасы Парламенті Сенаты депутатының орнына кандидаттарды тіркеу рәсімі 12 маусымға дейін жүреді, ал 13 маусымнан бастап барлық тіркелген кандидаттар сайлауалды үгітке кірісе алады.
Баспасөз қызметі
тел. 75-28-44, 75-23-69